Lem in cia...

Review: Kei le Penglam 3 te

Penglam 3 movie Zopau, Zolai tawh hong kibawl ciangin ka lei pah seisai hi. A Kala in zong ka en ngei khin hi. Ahi zongin a paute kithei lo ahih manin deihzahin zong ka tel kei hi. Zo lai, Zopau tawh ka et ciangin hih moive in ngaihsutna thak le kipuah toh ding nuntakna lamlakna tampitak ka mukha hi. A hancima tanute zong nakpitakin thupi le na nasepna te uh zahtakna kong pia hi. Hih sungah hoih ka sak mahmah le ka muh tunga ka mangngilh theih not loh kammal pawlkhat te in; Virus in sangnaupang thakte tungah a thugen masakna ah ;

“A keuh masa a note’n (vasa namkhat thu genna) a tuii dangte a buk pan suikhia, kidemna man ta

 

Kithahna tawh a nuntakna uh kipan, hih a ngeina uh … Zo ding maw… si ding…” cih kammal tawh mihing, leitung piancil lai thute hong telsak phapha hi. Zo ding maw si ding tanglai mihing nuntakna ahi hi.

 

“Nuntakna pen kidemna aimaw…na nawhtai kei uh leh midang khat in hong kheng lel ding aimaw…” ci-in a sangnaupangte tungah a kidem den mihng lungsim, amah sang pilzaw, hauzaw ding cih lungsim neihna le khantohna a manlang mahmah leitung khuahunte nasia takin lamlak hi. Hun tawh kiton zawh kei leh mite nungah ki-om den ding cihte zong hong mutelsak hi.

 

Ahi thei lo ding bang mah om lo hi.. Hi thei ding hi ci-in a hoih lam ngaihsutna tawh mihing nuntak siam ding zong hih bangin Penglam in gen hi.“Lungkham huai lua kei ee..na khut na lungtang tungah koih in la, lemin cia.. lemin cia. cilecin lemin cia….”

Tenglamnu‘ thugen zong hi ka sa mahmah hi. Tua laitak India innkuan zawngte dinmun le nuntak haksatna lak ka sa mahmah hi. Khangno pawlkhat university kahte lungsim lawng zo mahmah dingin zong lamen ing. Hihte a thei lo sangnaupang tampitak mah om dingin zong um ing… I nisim nuntakna ah hih thute in tu ni dong mah hong toto lai mawk hi lo hiam? Na cici ing.

 

“Aw inn nupi zong semkha lai…pau ding zong kikham nuam lai…ka haksatnate ka tapa tung gen kei leng, kua tungah gen ding ka hia..a lawmte tungah gen ding maw…”

Lawmta cih pen haksatna khat peuhpeuh a om ciangin kihuh ding, kipanpih ding, kitelkhialhna a om zongin itna mah kizo sak ding cih pen Tenglam pa’ zato a puakna uh pan kimu hi. Zato inn a tun dong mah Tenglam in a lawm Penglam te nih telkhial zo lai hi. Ahi zongin Pipi in zingciang laivuan ding na lai uh va sim un, a cih ciangin Penglam in….

 

“Laivuan bel omom lel incia… ahih hang pa khat bek om hiven..na pa dam kik lel in ciai… kilungnuamsak lel ou…” ci-in a gen pen mah ka lungsim hong lawngkha mahmah hi. Tua ni zan zong a lawmpa Tenglam pa’ zato lupna ah a thum un giak uhi.

Fenglam in a pa kiangah manzaih a suaknopna a gen ciangin a pa in phal loin om thapai hi. Hih bangin kong phal loh manin inn tun g leng suk niteh cih san hi. A lawm Penglam tawh a kithuah manin zong hih bangin nulepa thu mang lo hiteh ci-in mawhsak hi. Fenglam in..

 

“Ginalo na cih ka lawm Penglam in hih sungah nang le ka nu maan hong koihsak in, na kigui-awk sawm ciang hih a nui hieuhiau na nu le na pa’n na luanghawm mu leh a nui zo laitam cih ngaihsun in hong ci hiven…..” hih kammal in Fenglam pa’ lungsim sunem hi. Hih mun zong kei adingin thungaihsutna thak khat ka ngah behna mun mah ahi hi. Nang e na ngaihsun thak kha hia…..

 

Fenglam pa in a tapa tungah

“Ka tapa hih laptop man tawh camera a kilei zo dia….tam a mat zawk leh hong gen ou… Pai ou.. ka ta hanciam ou.. na nuntakna kipan ta ou tu’n …….” ci hi. Hih in Pate itna taktak hong lakhia mahmah hi. Pate in tate mailam ding gelsak uh a, a tawpna ah tate a it ‘pate’ in tate mailam khak zo tuan loin itna gal a kido uh a, itna gal ah itna mah in zo mawk hi. A lungsim a khauh mahmah Fenglam pa’ in a tapa utna a zuihna pen mahmah in laitang sukha mahmah hi.

 

Penglam te lawmta in a lawm Tenglam laikiat ding phal lo ahih manin itna tak taawh ama adingin quastion papter va guksak uhi. Nidanga laivuan a lau mahmah, lai kiat ding aut vet lo Tenglam kammal in,

“Lamdang hong sa sam ing ei..thuman ding hong gengen in ah….maizum nang khat hong pia leuleu…hithei kei…ka on leh zong ka hanciamna tawh ong nuam ing….ka kiat leh zong hoih sem lel e…..”

 

Hih Penglam 3 movie pen ka zak tungin ciamnuh bekbek ding ka sa a, ka thupi sim kei hi. Ahi zongin ciamnuh tawh a kibang movie pen nuntakna ah a kituakkha ding thu te vive le tuakkhakte vive na hizaw hi. Nuih nading sangin ngaihsut ding tampitak kimu behzaw hi. Mun tampitakah nehno in, dip ngek na sak mahmah hi. Zolai tawh a hanciam tanute zong nakpitakin zahtak kong pia hi. Mailamah Zomite mit vaksak hih bangin movie te nong hanciam tohtoh nading uh kei mimal in, kong thum nuam hi.

Hihte pen ka et vat tawh ka phawkkhak le ka lungsim sungah a teng den vat kammal pawlkhat ahi hi. Kei muh dan le kei ngaihsutzia tampite lak pan pawlkhat ahi hi. Nang zong muhna a tuam khat na nei ding hi. Kibang lo thei dingin lamen ing.. Hi pen kei muhna vilvel hi.

Kei muh khak loh thu hoih tampi na mu ding hi. Kei phawk khak loh thu tampi nap hawk lawh ding hi. Hong lamen ing. Nang zong Penglam tawh piangthak dih ve.. lawm…..thapia dih ve….

Zotanglian